أحياناً بتتحط فى موقف تضطر فيه تسمع كلام يوجعك
وبيبقى الكلام جايلك من حد عزيز عليك جدا أو جايز الكلام بيتقال عن العزيز عليك نفسه
بتسمع وإنت مستغرب وموجوع ومخنوق وضايع
بتسكت
أصل كلمه منك ممكن تضيع حاجه كبيره أو معنى إنت أساسا بتحاول تحافظ عليه
لما بتدى وعد إن الكلام دا مش هيوصل للمقصود منه
بتعافر وإنت بتقول ..... إسكت يا بؤى
وبترجع تسأل نفسك طيب لو قلت مش هبقى خنت ؟
فتسكت برضه
وبترجع تخاف
لو قلت ممكن حاجات كتير فى حياة ناس تتلخبط وتبوظ
هعيش بالذنب
بس أنا لو ماقلتش وكانت فيه عواقب أكبر بعد كدا ؟
ما أنا هعيش بذنب أكبر
بس لما تلاقى اللى قدامك مش مهتم أصلا تقول ولا ماتقولش يبقى إيه بأه ؟
إيه جدوى الكلام أصلا طالما ماحدش هيفهم اللى هقوله
إيه جدواه طالما أنا هفضل ساكته ؟
إلهام عزت
بس لما تلاقى اللى قدامك مش مهتم أصلا تقول ولا ماتقولش يبقى إيه بأه ؟
ردحذفإيه جدوى الكلام أصلا طالما ماحدش هيفهم اللى هقوله
عندك حق
احياناً يكون الصمت أبلغ من الكلام
تحياتي
وأحيانا بيكون وسيله لإنفاذ القدر
حذفبتمنى ربنا يكتب الخير وبس لكل اصحابى دايما
يبهجنى وجودك دوما هنا هبه
مساء البنفسج
ردحذفمش كل الاحيان بيكون السكوت افضل
ولا حتي الكلام
في مواقف واشخاص متعرفيش المفروض انك تتكلمي والا تسكتي
تخافي تتكلمي تزعليهم
وتخافي تسكتي بردو تزعليهم
مشكلة هي
مساءك بعطر زهرة قدمتيها وأنا أعشقها بالأساس
حذفهى مشكله فعلا
بس الواحد بيقول لو الكلام ممكن يجيب شر وممكن يجيب خير
يبقى السكوت فى ظل الإحتمالات هو الأسلم