ملحوظه

معلش إنشغلت عنك النهارده

لا أبداً مش زعلانه ولا مضايقه

وينشغل تانى وتالت ورابع حتى فى يوم الأجازه

بس أنا مش هفضل مش زعلانه

أنا بنى آدم برضه

أنا أعشق الإهتمام

يجب أن تعرف ذلك

عليك التقدير


                                        .... إلهام عزت ....

جلسة فى الشتاء

الآن الساعه الثانيه والنصف بعد منتصف الليل

الجو قارس البروده والأمطار رافضه للتوقف عن السقوط

رياح شديده أسمع صوت تطاير الأشياء بالخارج

وحشة الشتاء عند البعض هى منتهى منتهى الروعه عندى

السهر فى لياليه البارده .. مج القهوه الساخن .. حكاياتنا وجلستنا بجانب المدفأه

كلها كلها أشياء أنا أعشقها

الثرثره المسائيه لها بريق خاص ... يزداد بكونك موضوع السهره

أول نظره .. أول موقف .. أول ورده ...

إعترافاتى متبوعه بحمرة خدى يزيد من

حرارة الجلسه العائليه

أنا حقا أعشق الشتاء

ما بالك عندما يجتمع وسيرتك فى نفس اللحظه ؟!!


                         ....... إلهام عزت ........

مـــشـــاعـــر

ولأن من الأحلام ما تسقط فجأه  وغالبا لعدم وجود شركاء لنا فيها


قررت إتخاذ شريك


بداية الأمر ... سابق معرفه يجعل كلانا لا يأمل بوجود ميل من أى نوع
لكن الأقدار رأيها كان مختلف


الآن أنا مقتنعه أنها تفهم أكثر منّا


الورود تحمل فى طياتها الكثير
لكن من يهبها ومتى هنا يَكْمُن الإختلاف


الخوف من الأشياء يمنعنا من الإستمتاع بها أحيانا
أو يحتفظ لنا بالقدر الأكبر من المتعه حين نصل إليها



آثر الوردة الأولى يُحفر فى الذاكره بلا شك


الإبتسامة الأولى
الحُمرة الأولى
الإنتظار الأول


هجوم المشاعر لا يعترف بسابق الكلام



وردّيه .... قَسَمٌ لن يفهمه سوا العشاق



ربما تصل لمرحله سريعاً لكن أن تبقى فيها ولا تنتقص منها
ذاك هو الإبداع فى الشعور



تلك هى المشاعر

*
*
*
*
                                                                                       ** إلهام عزت **

فــــتـــره مــــش ســـهـــلــه

كل حاجه لسه فى البدايه

ماعرفش إيه ممكن يبسطه إيه ممكن يزعله 

كل حاجه بختبرها معاه لأول مره

الضحكه .. الفرحه ... التكشيره ... رد الفعل 

كل حاجه كل حاجه لأول مره

حاجز لا مرئى بينى وبينه

جايز جدا أكون أنا بس اللى بشوفه وجايز يكون شايفه هو كمان

جايز يكون الحاجز دا طبيعى وجوده أصلا 

وجايز أنا اللى إخترعته 

مش مهم المهم فعلا إنها فتره مش سهله

بس الأهم إنى جوايا اللى يخلينى مصره على تجاوزها 

وبنجاح إن شاء الله 

{ لا شئ يقف أمام الإراده الصادقه }

هو إحنا هنعلمه للناس وننساه إحنا !!!

يمكننى أن أترك نفسى تهوى 

يمكننى أن أطمئن عليها بين يديه

                                                                              ..... إلهام عزت .....

الــكــريــســتــالـــه الـــكـــاذبــــه

مقدرش أقول إتربينا غلط

بس برضه ماقدرش أقول صح بنسبة 100%

بالرغم من إنى بحترم آبائنا جدا { وبابايا طبعا على رأس القائمه بالنسبالى } 

وبحبهم أوى ومقدره تعبهم وسهرهم علينا كلنا

بس عارفين كتير من آبائنا لما ربنا رزقهم بينا

حبونا جدا لدرجة إنهم إحتفظوا بينا فى بلورات كريستاليه قويه جدا

 علشان يحافظوا علينا

بس هما ما أخدوش بالهم إننا يوما ما هنطلع من الكريستاله

 وهنواجه المجتمع اللى بره

هما بس كل قصدهم كان إننا نطلع نحب الخير فعلمونا نعمله إزاى 

بس ما قلولناش مع مين يتعمل ومع مين لأ ولا مين يستاهل ومين مايستاهلش 

ولا حتى عرفونا نعرفهم من بعض إزاى 

أصلهم علمونا إن الخير هو بس اللى موجود وإننا هنقابله طوووول الوقت 

وكإنهم كانوا بيحاولوا يبعدوا عننا فكرة وجود أشرار

 علشان مانطلعش إحنا أشرار مثلا

كل اللى حواليا مليانين خير وحب وسلام وطمأنينه

محدش بيكره حد ولا حد بيتمنى زوال نعمه من التانى

بس أنا كبرت شويه .... اللى هو شبيت عن الطوق يعنى ....

 خرجت للحياه وبجد زعلت أوى

أصل اللى لقيته ماكنش اللى إتعلمته فى الكريستاله طووووول السنين اللى فاتت

أنا عادى يعنى لقيت ناس بتكره بعضها وناس مش بتحب الخير

 ولا بتحب تساعد حد

دا أنا اللى أكتر من كده إنى لقيت ناس بتتمنى زوال النعمه اللى فى إيدك كمان

 آه والله

يالا ربنا يكفينا شرهم وخلاص

بس نصيحه لما ربنا يكرمكم بأطفال علموهم الخير وعرفوهم طريقه كويس جدا 

إزرعوه جواهم

بس إدوهم شوية رتوش كده عن اللى هيقابلوه بره 

علشان ما يتصدموش وبالتالى ما يتوجعوش

رجاءا جنبوهم كل حاجه حصلت معاكم

وروحوا بوسوا إيدين بابا وماما 

علشان هما بجد بيحبوكوا أوى أوى أوى

                                                                                                       إلهام عزت 

التواصل اللا مباشر

فيه حته كدا فى نفوسنا البشريه أكيد مقتنعه 

إن التواصل وش لوش غير كل طرق التواصل التانيه 

سواء نت .. موبايل .. جوابات أى حاجه بأه

أنا كمان جوايا نفس الحته اللى جوه كل الناس بس بزياده شويتين

أنا بعشق فكرة إنى أشوف الناس وأقرأ ملامحهم وردود أفعالهم

أنا بكره فكرة إنى أقول لحد كلمه فى التليفون ورد فعله مايوصلنيش لإنى مش شيفاه

فأضطر أسكت .... ما أنا هرد إزاى وأنا مش عارفه أفهم إذا كان فهم قصدى ولا لأ

أصلا فيه حاجات كتير بتوه منى لإنى مش شايفه وش اللى قدامى

أنا بكره الإحساس ده موووووووت

أيييييييوه أنا بحب التواصل المباشر

أنا بكره كل شئ مش مباشر فى الحياه

أنا أحب أقول إنى بحب فى وش اللى بحبه وإستحاله أعرف أقولها ع التليفون على فكره

وجايز ماعرفش أقولها فى وشه بس هوه هيحسها شووور يعنى

أنا برضه أحب أبصلك بقرف لإنى مضايقه منك فى وشك 

بس مش هقول فى حقك كلمه غلط قدام حد غيرك

أنا لما أزعل منك هاجى أقولك مش هقول لحد إنى زعلانه منك ولا هقول لحد عن السبب فى زعلى ده

أنا أصلا بكره فكرة إن حد يطلع على حياتى ولو حتى حد قريب منى

أنا بحب حكاية المكنونات ( حور مكنونات )  إفهموا بأه الله

بجد بأه التواصل اللامباشر ده شئ مقيييييت  
حقيقى بيلغى كتير من الإنسانيات التى لا تستقيم حياه بدونها


                                                                    إلهام عزت

مـــــــــومـــــــــــــــس

قبل ماتحاسبوها هى عملت كدا ليه ؟

إسألوا نفسكوا إنتو عملتوا فيها إيه ؟

المومس دى جايز جدا تكون قريبتك فى يوم من الأيام 

أو قريبك لإن فيه مومس ولد على فكره

إحنا بنصب عليهم جاااااااااااااام غضبنا 

لإنهم خرجوا عن الطريق القويم وباعوا نفسهم

بس إنت شفت واحد أو واحده مش لاقيين ياكلوا

 وضميرك الحر أوى دا ماتحركش وساعدهم

هو إنت صدقتك وزكاتك متخيل إنهم الاتنين جنيه 

اللى بتحطهم فى ايد مسكين كل كام يوم دول ؟!!

لأ خالص على فكره دى الزكاه الظاهره بس

بنقتلهم ونرجمهم بالحجاره ونشتمهم ونرميهم بالرده والكفر 

بس لو حد منهم جالنا تائب وبيبكى مش بنوافق نشغله معانا 

أصلنا ما بننساش كان إيه .... إحنا مابنعرفش نغفر ....

 والمبرر إحنا مش ربنا 

مجتمع ســـــــــــــــــــــــوء

بس إحنا اللى بنيناه

                                                                                                    إلهام عزت

إنت رِجـــْــــــــــــل

كل اللى ظاهر منك فـ الحياه

رجلين

رجلين بتسعى

رجلين بتمشى

رجلين تدوس

رجلين تُجور

رجل سانده

رجل شاهده

رجل رايحه

ورجل جايه

رجل تاخد حقها

رجل تهدم فرحها

رجل تسكن فـ القلوب

ورجل تِرجم قوالب الطوب

رجل بيضا

ورجل سودا

رجل ضافرها كِيف حافر

ورجل ضافرها مش باين

رجل شايله قلب أبيض

رجل ضامه طفل يلعب

رجل ساكته ع الحقيقه

رجل بلسان من فضيحه

رجل صالحه

رجل طالحه

رجلين فصيحه

فـ النهايه

إنت رِجْلْ

                                   
                                                                               إلهام عزت

إنــتــظــار بــلا نـــهــايــه

بحثتُ عنكَ داخلى كثيراً 

ولم أجدك أبداً 

ثم إكتشفت فيك 

فجأة 

نبضة لحياه 

***

فى ذاك اليوم 

حينما كنت تلهو معى 

كنت سعيدة جداً 

وكنت أدرك أن فرحة 

القلب الصاخبه 

تنبهنى لشئ ما 

شئ ما سيأتى 

***

بقيت فى مكانى أنا منتظره 

تدفعنى رغبة لأن أناديك 

رغبة لحوح 

لا تنتهى 

وأنت بعيد 

جداً بعيد 

تَـمُـرُّ فتلقى بعض الظل 

فوق العين ... وفوق القلب 

وبين الروح 

***

وتغدو 

فيضيع الظل 

***

نهارات تأتى 

ظلال تنتظر 

ليالٍ تتبدل 

ومساءاتٍ تضيع 

***

رائع أن نولد من جديد 

بين يدىّ الحب 

***

ولكن 

ماذا لو إنطفأ الحلم 

ولوّحت تلك اليد بالوداع ؟

!!!

!!

!

                                                               إلهام عزت

لـــقـــاء الـــقــطــار

كما أفعل كل يوم منذ زمن طويل استيقظت من نومى على صوت الآذان الخاص بالمسجد القريب من بيتنا

وصوت هذا الديك الساكن فوق سطح جارتى تهانى

وصوت الجلبه التى تحدثها أمى فى المطبخ لاعداد الحليب لنا 

توضأت وصليت فرضى قبلت يد أمى وبنظرة رضا منها رددت دعواتها التى أعشقها 

أخذت حقيبتى وتوجهت لركوب القطار المتهالك الذى هده الزمن 

وأصابه صغار قريتنا بالمرض من كثرة شقاوتهم وكتابتهم على كراسيه الجلديه القديمه 

وقشر اللب الذى يملء أركانه 

وهذا الشباك الذى كسره أحمد ابن عم حسين البقال انتقاما من فوزى الشحات عندما قال له أنه بخيل زى أبوه 

ركبت القطار ولسانى يتمتم بالأذكار كنت معتاده على الركوب بنفس المكان يوميا

لم أغيره من زمن لدرجة أننى لا أتذكر أن كنت ركبت فى كرسى آخر من قبل 

الاّ تلك المره كان هناك من يشغل مقعدى 

صرخت بداخلى مكانى لكن مظهره يدل انه ليس من ابناء قريتى فتراجعت قليلا

ضممت حقيبتى وجلست بالكرسى المقابل دون أن ألقى تحيه 

كان يرتدى نظاره تهبه مظهر الجديه

كان مندمج فى القراءه كثيرا وكأنه لم يلمح وجودى من الأساس

لم أحاول اثارة انتباهه

عكس طبيعتى فدائما ما أحاول لفت انتباه من أمامى ربما أجد لديه حديث شيق يقتل الوقت 

حتى لا أشعر بطول سفرى وبرد القطار الصباحى 

جلست صامته أختلس نظرات الأستكشاف دون جديد

ظهر عم فتحى شااااااى ..... قهوه .... ينسووووووون ..... بسكوت .... بسكووووووت ..... مناديييييييل

هنا التفت اليه قائلا من فضلك قهوه مظبوطه وسألنى .... تشربى حاجه ؟ 

لخبطنى 

... لأ .... لأ ..... شكرا

انتظرت أن يفتح معى الحوار الذى أنتظره لكنه عاد الى أوراقه بهدوء 

شرب قهوته وأعاد الأوراق الى الحقيبة السوداء ووقف

ألقى التحيه ونزل فى المحطه التى تسبق محطتى بساعه كامله

وتركنى

لا أستطيع العوده الى الكرسى الذى اعتدت الجلوس به 

فبقيت مكانى

أنتظر محطتى الآتيه

                                                                                   إلهام عزت

على فكره

أنا تفكيرى مش عاجز لما آخد قرار بإنى مش هتجوز بأمر الله واحد مش بيشرب سجاير

أنا تفكيرى مش عاجز ولا سطحى لما يكون دا سبب رفضى الإرتباط بحد من وجهة نظر الكل مثالى

أنا مش سطحيه لما أكون مقتنعه إنى كدا مش بغضب ربنا ولا بعجز الناس

ياجماعه كل واحد ليه قدرة إحتمال لحاجات وحاجات تانيه لأ

إنتو ليه مش بتحترموا أسباب كل واحد بأه

    واللى مش عاجبه يطق يموت بأه هه

                                                           إلهام عزت

حوار بينى وبين أختى ..... حقيقى وبالحرف

* * أنا اعانى من لخبطة شديده

      سبعة عشر يوماً أشاهد قنوات تنقل أحداث ورؤى الناس فى رابعه العدويه



* وأنا أعانى من لخبطه

   عامان وأكثر ونحن فى مهاترات لا آخر لها والدماء من حولنا بلا نهايه



** قطبي مغناطيس يجذبانى بقوة متساويه حتى بدأ رمضان

وبدأت معايشتى للناس فى رابعه وجدت نفسى تنجذب ولأول مره لقطب

وتفاجئت اليوم أن ملايين إتجهت نحو القطب الآخر التى نأت نفسى عن الإتجاه إليه





* نفس المغناطيس كان يجذبنى وبنفس القوه المتساويه تقريبا

   حتى صدمت من ردود أفعال كل من حولى

  شخص عادى يتحول لجبهة الإخوان ومن الإخوان من يصمت لجهله

أو ربما عدم إدراكه لما يأتى فى المستقبل قريبا كان أو بعيد

وصمت يعم أشخاص كثر لأنهم فى ذهول إنها حرمة الدم والأشهر الحرم

أنا سأصمت



** بالأمس كان إفطار رمضان لعائلتنا يوما ننتظره كل عام

  الكل يبدع كل جديد فى هذا اليوم لإضفاء روح رمضان والعائله عليه

  هذا العام

 كانت المائده مميزه عن كل الأعوام الماضيه ولكنى كنت أفتقد شيئا فى وجوه الجميع

كان هناك تحفظ فى الكلام الكل يخشى من رد فعل الآخر

يخشى أن يعبر عن رأيه الحقيقى فيصطدم بالآخر وينتج توتر غير مريح يعبئ المكان





* أكثر ما أخافنى فى هذا اليوم هو تحفذهم قبل بداية اليوم من الأساس

   ردوردهم على بوستات صفحات الفيس بوك دعوات جبهه على أخرى

إنتظار الجميع ذلك العام لم يكن إنتظارا للإفطار العائلى

  كان إنتظارا للحرب الكلاميه

أبدا لم أشعر بالدفء الذى إعتدته فى البيت

أتعرفين كنت أذهب لكل واحد منهم على حده لأحدثه فى أذنه وأستحلفه بالله يعدى اليوم

 على خير ويسيبنا نفطر فى هدوء بس ولاااااااا الهوا

   كل ما خشيته حدث

  بس الحمد لله عندما جاء وقت الكنافه ضحكوا مع بعض

   أبى تلك الجهه الودوده المنصفه الحياديه دوما تحكم الجلسه

  عجبنى وهو بيقول بس بأه عاوزين نفطر بطلوا



** هل شاهدتى فيلم أرض النفاق ؟


* بتاع فؤاد المهندس ؟

** أيوه



* ماله بأه ؟

** أكتر حاجه تعبته الصراحه

 كان الناس يحدثونه  بكلام ويرى عقولهم تتحدث بكلام آخر يبين مشاعرهم الحقيقيه

أنا نفسى ولو ربع ساعه صراحه لأعرف ما وراء السطور والنوايا الحقيقيه




* ياااااااه يا بنتى دى كانت إتحلت من زماااااااااااان

  بس تصدقى فكره جامده

                                                                                إلهام عزت

حلمٌ بات يرهقنى كثيراً

مـا بـيـن طـفـلـة سـكـنـتـنـى لـسـنـوات عـــــدّه

وبـيـن إحـسـاسـى بـالـبـراءة الـتـى أعـشـقـهـا

ومـجـريـات الـحـيـاة وتـفـاصـيـلـهـا الـمـرهـقـه

رحـــايــا أنــا أُطْــحـن بــداخـلـهـا

مـا بـيـن تـفـكـيـرى بـبـصـمـات الأصـابـع الـتـى لا تـتـشـابـه

وأشـكـال الـبـسـمـة الـتـى لا تـتـشـابـه

والـزهـور أيـضـا الـتـى لا تـتـشـابـه

أجـدنـى  أنـا أحـمـل الـكـثـيـر مـن الـلامـتـشـابـهـات

مـا بـيـن فـكـرة الـمـوت والـحـيـاه

الـفـقـد والـتـجـمـع .. الـفـراق والـلـقـاء

والـكـثـيـر مـن الـصـراعـات

أجـدنـى أنـا مـحـط الأحـداث

مـا بـيـن قـصـائـد كـتـبـتـهـا لأجـلـه

وأخـرى كـتـبـتـهـا لأجـلـى أنـا

والـكـثـيـر مـن الـكـلـمـات كـتـبـتـهـا لأجـلـهـم

مـخـتـصـره كـل مـشـاعـرى وأحـاسـيـسـى فـى حـروف 

رأيـتـهـا بـاهـظـه ورأوها ضـئـيـلـه

أجـدنـى أتـحـسـس كـل نـقـطـة مـنـهـا ثـم أضـرم فـيـهـا الـنـار

وأهـبـهـا لـلـــريــح

مـسـاحـات بـيـضـاء فـى حـيـاتـى

لـن أسـمـح لأحـدهـم بـتـلـويـنـهـا

هـى مـلـكـاً لـى وحــدى

وهـذا مـا يُـصّـر الآخـرون عـلـى عـدم إحـتـرامـه

حلمُ بات يرهقنى كثيراً أن أحتفظ بمساحتى الخاصه بعيداً عن أصابعهم الملوثه

                                                                             إلهام عزت