الخميس، 24 أبريل 2014

هدم .... بناء



فيه شخصيات بيكون تكوينها النفسى صعب جدا
بعترف إنى من الشخصيات دى لكنى مش قادره أقول للأسف
لإنى حقيقى مش آسفه على تكوينى ده بالعكس أنا معجبه بيه جدا ومقتنعه إنه الأفضل فى ظل الحياه اللى بنعيشها دلوقتى والمجتمع والناس اللى حوالينا
القليلين اللى شبهى بيعانوا جدا فى الحياه
كل حاجه بتتبنى جواهم بتاخد وقت كبييييير جدا وهّزات صغيره أوى بتهدهم
دى مش هشاشه نفسيه بقدر ما هيا بساطه وحساسيه تجاه المحيط الخارجى

علشان نثق فى حد بنحتاج وقت ومواقف ومسافه من الحميميه مش كتير بنقدر نسمح لحد يوصلهم معانا
بس المؤسف فعلا بأه إننا لما نوصل مع أى حد فى الدنيا للمسافه دى وفعلا خلاص بنثق وبنبدأ نقرب بعزم ما فينا
بنتفاجئ بعدم تقدير ولا إعتناء منهم أنا عارفه مش بيكون قصدهم غالبا
كل اللى بيحصل إنهم بيتخيلوا إنه خلاااااص وصلنا ... بس هما مش بيكونوا فاهمين إن الثبات عندنا بعد الوصول هوه الأهم
علشان كدا بننتكس ونتوووه وناخد ضربه على دماغنا تهد المبنى اللى بنيناه كله على دماغنا
وبنيجى لللحظه الحاسمه ... هنعرف نبنى تانى جوانا .. طيب هنعرف لو فاضل دور نكمل بعده
ولا هنكمل هدم ونساوي جوانا بالأرض ونريح دماغنا ؟
كل الأسئله دى محدش يعرف يجاوب عليها ولا أنا عارفه أجاوب عليها بما إنى من الناس دى برضه
الخوف بأه
إنى لو إتهد جوايا حاجه ماعرفش أتصرف
أنا بقى حاليا مش عارفه أتصرف



..... إلهام ......

الأحد، 12 يناير 2014

كلمه سهله بس صعبه




بحبك


بس مش شايفه إنى لازم أقولها دايما بالتصريح

مش معنى كده إنى مش هقولها عارفه إنى لازم أقولها أحياناً

بس شويه شويه جايز آخد شويه وقت بس صدقنى النتيجه هتكون أكتر ما بتتمناها

أنا ببقى خلاص قربت أخطى الحاجز وأتكلم بس إنت بتسبق وتلوم

بترجعنى الخطوه وخطوه كمان لجل آدارى الخجل الباين فى خدودى وصوتى

لو مش قادر تستحمل بنت إتجرحت مره فى مشاعرها بنت كرستاله

يبقى إزاى راح تتحمل زوجه بتتمنى تشوف معنى الحلم معاك

!!!

مش خايفه منك أنا بتمنى أعيش الحلم جوه روحك وبين إيديك

بس زود حبه من الآمان تلاقينى دوبت فى حبى ليك


                                                                                                                                 إلهام عزت

الجمعة، 13 ديسمبر 2013

ملحوظه



معلش إنشغلت عنك النهارده

لا أبداً مش زعلانه ولا مضايقه

وينشغل تانى وتالت ورابع حتى فى يوم الأجازه

بس أنا مش هفضل مش زعلانه

أنا بنى آدم برضه

أنا أعشق الإهتمام

يجب أن تعرف ذلك

عليك التقدير


                                        .... إلهام عزت ....

جلسة فى الشتاء




الآن الساعه الثانيه والنصف بعد منتصف الليل

الجو قارس البروده والأمطار رافضه للتوقف عن السقوط

رياح شديده أسمع صوت تطاير الأشياء بالخارج

وحشة الشتاء عند البعض هى منتهى منتهى الروعه عندى

السهر فى لياليه البارده .. مج القهوه الساخن .. حكاياتنا وجلستنا بجانب المدفأه

كلها كلها أشياء أنا أعشقها

الثرثره المسائيه لها بريق خاص ... يزداد بكونك موضوع السهره

أول نظره .. أول موقف .. أول ورده ...

إعترافاتى متبوعه بحمرة خدى يزيد من

حرارة الجلسه العائليه

أنا حقا أعشق الشتاء

ما بالك عندما يجتمع وسيرتك فى نفس اللحظه ؟!!


                         ....... إلهام عزت ........

الأحد، 8 ديسمبر 2013

مـــشـــاعـــر



ولأن من الأحلام ما تسقط فجأه  وغالبا لعدم وجود شركاء لنا فيها


قررت إتخاذ شريك


بداية الأمر ... سابق معرفه يجعل كلانا لا يأمل بوجود ميل من أى نوع
لكن الأقدار رأيها كان مختلف


الآن أنا مقتنعه أنها تفهم أكثر منّا


الورود تحمل فى طياتها الكثير
لكن من يهبها ومتى هنا يَكْمُن الإختلاف


الخوف من الأشياء يمنعنا من الإستمتاع بها أحيانا
أو يحتفظ لنا بالقدر الأكبر من المتعه حين نصل إليها



آثر الوردة الأولى يُحفر فى الذاكره بلا شك


الإبتسامة الأولى
الحُمرة الأولى
الإنتظار الأول


هجوم المشاعر لا يعترف بسابق الكلام



وردّيه .... قَسَمٌ لن يفهمه سوا العشاق



ربما تصل لمرحله سريعاً لكن أن تبقى فيها ولا تنتقص منها
ذاك هو الإبداع فى الشعور



تلك هى المشاعر

*
*
*
*

                                                                                       ** إلهام عزت **

الأربعاء، 30 أكتوبر 2013

فــــتـــره مــــش ســـهـــلــه








كل حاجه لسه فى البدايه

ماعرفش إيه ممكن يبسطه إيه ممكن يزعله 

كل حاجه بختبرها معاه لأول مره

الضحكه .. الفرحه ... التكشيره ... رد الفعل 

كل حاجه كل حاجه لأول مره

حاجز لا مرئى بينى وبينه

جايز جدا أكون أنا بس اللى بشوفه وجايز يكون شايفه هو كمان

جايز يكون الحاجز دا طبيعى وجوده أصلا 

وجايز أنا اللى إخترعته 

مش مهم المهم فعلا إنها فتره مش سهله

بس الأهم إنى جوايا اللى يخلينى مصره على تجاوزها 

وبنجاح إن شاء الله 

{ لا شئ يقف أمام الإراده الصادقه }

هو إحنا هنعلمه للناس وننساه إحنا !!!

يمكننى أن أترك نفسى تهوى 

يمكننى أن أطمئن عليها بين يديه





                                                                              ..... إلهام عزت .....

الأربعاء، 23 أكتوبر 2013

الــكــريــســتــالـــه الـــكـــاذبــــه







مقدرش أقول إتربينا غلط


بس برضه ماقدرش أقول صح بنسبة 100%

بالرغم من إنى بحترم آبائنا جدا { وبابايا طبعا على رأس القائمه بالنسبالى } 

وبحبهم أوى ومقدره تعبهم وسهرهم علينا كلنا

بس عارفين كتير من آبائنا لما ربنا رزقهم بينا

حبونا جدا لدرجة إنهم إحتفظوا بينا فى بلورات كريستاليه قويه جدا

 علشان يحافظوا علينا

بس هما ما أخدوش بالهم إننا يوما ما هنطلع من الكريستاله

 وهنواجه المجتمع اللى بره
هما بس كل قصدهم كان إننا نطلع نحب الخير فعلمونا نعمله إزاى 

بس ما قلولناش مع مين يتعمل ومع مين لأ ولا مين يستاهل ومين مايستاهلش 

ولا حتى عرفونا نعرفهم من بعض إزاى 

أصلهم علمونا إن الخير هو بس اللى موجود وإننا هنقابله طوووول الوقت 

وكإنهم كانوا بيحاولوا يبعدوا عننا فكرة وجود أشرار

 علشان مانطلعش إحنا أشرار مثلا

كل اللى حواليا مليانين خير وحب وسلام وطمأنينه
محدش بيكره حد ولا حد بيتمنى زوال نعمه من التانى

بس أنا كبرت شويه .... اللى هو شبيت عن الطوق يعنى ....

 خرجت للحياه وبجد زعلت أوى

أصل اللى لقيته ماكنش اللى إتعلمته فى الكريستاله طووووول السنين اللى فاتت

أنا عادى يعنى لقيت ناس بتكره بعضها وناس مش بتحب الخير

 ولا بتحب تساعد حد

دا أنا اللى أكتر من كده إنى لقيت ناس بتتمنى زوال النعمه اللى فى إيدك كمان

 آه والله

يالا ربنا يكفينا شرهم وخلاص

بس نصيحه لما ربنا يكرمكم بأطفال علموهم الخير وعرفوهم طريقه كويس جدا 

إزرعوه جواهم

بس إدوهم شوية رتوش كده عن اللى هيقابلوه بره 

علشان ما يتصدموش وبالتالى ما يتوجعوش

رجاءا جنبوهم كل حاجه حصلت معاكم

وروحوا بوسوا إيدين بابا وماما 

علشان هما بجد بيحبوكوا أوى أوى أوى




                                                                                                       إلهام عزت 

السبت، 19 أكتوبر 2013

التواصل اللا مباشر






فيه حته كدا فى نفوسنا البشريه أكيد مقتنعه 

إن التواصل وش لوش غير كل طرق التواصل التانيه 

سواء نت .. موبايل .. جوابات أى حاجه بأه

أنا كمان جوايا نفس الحته اللى جوه كل الناس بس بزياده شويتين

أنا بعشق فكرة إنى أشوف الناس وأقرأ ملامحهم وردود أفعالهم

أنا بكره فكرة إنى أقول لحد كلمه فى التليفون ورد فعله مايوصلنيش لإنى مش شيفاه

فأضطر أسكت .... ما أنا هرد إزاى وأنا مش عارفه أفهم إذا كان فهم قصدى ولا لأ

أصلا فيه حاجات كتير بتوه منى لإنى مش شايفه وش اللى قدامى

أنا بكره الإحساس ده موووووووت

أيييييييوه أنا بحب التواصل المباشر

أنا بكره كل شئ مش مباشر فى الحياه

أنا أحب أقول إنى بحب فى وش اللى بحبه وإستحاله أعرف أقولها ع التليفون على فكره

وجايز ماعرفش أقولها فى وشه بس هوه هيحسها شووور يعنى

أنا برضه أحب أبصلك بقرف لإنى مضايقه منك فى وشك 

بس مش هقول فى حقك كلمه غلط قدام حد غيرك

أنا لما أزعل منك هاجى أقولك مش هقول لحد إنى زعلانه منك ولا هقول لحد عن السبب فى زعلى ده

أنا أصلا بكره فكرة إن حد يطلع على حياتى ولو حتى حد قريب منى

أنا بحب حكاية المكنونات ( حور مكنونات )  إفهموا بأه الله

بجد بأه التواصل اللامباشر ده شئ مقيييييت  
حقيقى بيلغى كتير من الإنسانيات التى لا تستقيم حياه بدونها


                                                                    إلهام عزت