فتى وفتاة الأحلام

إنتى بتدورى على إيه فى فتى أحلامك ؟

إنت بتدور على إيه فى فتاة أحلامك ؟

السؤال دا بيتسأل كتير وتقريبا بيكون مقدمه لكل مشروع إرتباط

الإجابه نسبيه أوى على فكره

متدين ... خلوق ... عيله محترمه... ميسور ماديا ... وسيم ... ناجح ...

 ثابت فى عمل دائم .... رومانسى

.... رااااااااااااااااااجل ......

ملتزمه ... بنت ناس .... حلوه .... بتشتغل .... مابتشتغلش
 جامعيه .... دلوعه
..... أنثى ......

شفتوا الموضوع بسيط إزاى !!!!

بإختصار كل واحد وواحده بيدوروا على الصوره المثاليه اللى متكونه فى عقولهم 

........  على فكره  .....

علشان كدا بيتصدموا

                                                إلهام عزت

توأم الحب الوسيم

الواحد طوووول عمره نفسه يحب 

بيتفرج على تليفزيون .. بيسمع راديو ... بيقرأ كتاب ... بيسمع حتى حكاوى أصحابه 

كل حاجه بيعملها بيدور فيها على قصه حب تمسه .. يحسها ... يتمنى يعيشها

أنا طووووول عمرى نفسى أحب

ماما ... و ... بابا

قصة حب مخلوطه بشوية صعوبات حياه على حبة كفاح بس بجد ...... أنا نفسى

أعيشها

أخواتى ولاد وبنات .... مع زوجاتهم وأزواجهم

قصص حب بس جت بعد الجواز وعلشان الدقه خليها بعد الخطوبه .... مخلوطه

برضك بصعوبات تعامل فى البدايه 

عادى يعنى بتحصل ..... المهم إنها جت " قصة الحب يعنى "

صديقاتى وأصدقائى قصص حب برضه .... بس شويه بتستمر ... وشويه بتنتهى

الحياه متلخبطه قدام عيونى جدا على فكره

اللى مطمنى شويه إنى شايفه بابا وماما ...... يعنى فيه شوية ثبات

سؤال : مواصفات معينه اللى بتتمنيها ؟

إجابه : طبعاً

من نفس السائل : بس إنتى كدا بتعقديها !!!

منى : هو أنا لسه قلت حاجه ؟!!!!

السائل : طاب قولى طلباتك

أنا : القبول - الكفاءه - السكن والموده - ويراعى ربنا فيا

السائل : إمممممم ( يتبعها بنظرة خبيثه كدا ووواحده إستغراب بعدها )

صـــــــــــــــــــــــــــــــمــــــــــــت

الإعجاب ...... بداية كل شئ

الموضوع دا بدأ تقريبا من تالته إبتدائى 

الولد اللى بيدافع عنى ضد كل الولاد ويضرب أى حد يزعلنى .... بحبه يا ماما

إعدادى 

مدرس اللغه العربيه ..... وااااااااااو بفهم منه وطريقة شرحه تجنن .... بحبه يا ماما

الثانوى 

الولد اللى بيقرا قرآن فى الطابور الصباحى صوته خرااااااااافى .... بحبه يا ماما

الجامعه

زميلى من ثانوى اللى فى كليه تانيه وبييجى عندنا الكليه بييجى لييييه ؟!!! ......

بحبه يا ماما

تــــــأمــــل 

كل دا ماكنش حب ..... كل دا كان إعجاب 

أيــــــــــــــــــــــــــــــــوه هو إعجاب

ذلك التوأم الوسيم للحب

.

.

.

المره الجايه نتكلم عن الحب بذات نفسه بأه

   إلهام عزت

يعنى إيه جــــــــــواز ؟

بنت وولد

كبروا

خرجوا للحياه

إتقابلوا 

صدفه بأه .. ترتيبات قدر .. صالونات ...... مش فارقه

المهم إنهم بعقد وشريعه أصبحوا زوج وزوجه

ممشى طوووووويل , سجاده حمرا , ورد على الناحيتين , وطفله صغيره بترمى الورد عليهم

مباركات .. تهنئه .. دعوات .. فـــــــــــــــــرح

ألبوم صور

بيت  بباب يتقفل عليهم .............. بس .... بدأت الحكايه

علبة ألوان كامله بس الرسام الشاطر يعرف يستعمل مين وفين وإمتى

 رغبه فى سعاده ... دافع .... لسه الغربال جديد

فطار ... غداء ... عشاء .... ضيوف .... إبتسامات ... لعبه جديده ليها رونقها برضه

شهر ... شهرين ..تلاته .... الحياه بتستمر

شغل ... بيت ... أصحاب ... أهل ... مناسبات ... واجبات 

حدث جديد

طفل

توتر .. قلق ... مزاج بيتغير أحيانا ... إحتمال ... عديها .... إحتواء  ..... آخر واحده دى هى الأهم

وصل .... الحمد لله

تابع .... صور جديده فى الألبوم 

هدف جديد ظهر .... طاقه وغربال جديد يتشد

أصول للتربيه .... محاولات لمنح الحياه إنسان صالح

ويمر الوقت

شغل ... بيت ... أولاد ... إلتزامات ... وبعض خلافات مش بتخلو منها الحياه عادى يعنى

مـــلــل

صوت .... قصاد صوت ..... تراكمات من فسافيس صغيره تكبر

مجاهره بالتعب .. والزهق ... وعدم القدره على الإحتمال

فييييييييييييييييين الغربال ؟

..... هو ده بأه وقته ..... لازم يتشد من تانى

خروجه حلوه ... يومين تغيير جو ... هديه رومانسيه .... ورده حتى مش فيلم يعنى 

لتعود الإبتسامه ...... ويستكين المنزل

يعدى وقت طوييييييييييييييل

بتزيد الإلتزامات ...... وبيتعب الطرفين من طوووووول البذل والعطاء

بيبدأ الصوت الجهورى فى الظهور .... المرادى الدنيا بتوسع .... بتوسع .... بتوسع

فييييييييييييييييين علبة الألوان ؟

هو دا وقتها بالظبط بأه

الحياه محتاجه تغيير وشوية فرحه كده وروتوش إنشالله على حيطة الصاله وفـ أوضة النوم  وأوضة الأولاد نرسم فراشه

نتجمع على الغدا من تانى 

كوبايتين شاى من إيدها ..... كيك لطيف من إيدها برضه .... ترجع تلاقيه ماسك ألبوم الصور 

مستنيها علشان يرجعوا تانى بالزمن مع بعض

ضــــــــــــــحــــك

وبوسه يطبعها على راسها وكف إيدها على قلبه الإتنين معناهم يااااااااااااااه ع الأيام الحلوه اللى عيشتها وياك

وئام وشوية طمأنينه وسلام ...... تجديد عهد وثقه وشد الغربال من جديد

هو دا الجواز

                                              إلهام عزت 

الـــفـــراشــــه الـــضــــالـــه

ضوء قادم يعبر بين الأشجار

تمطر فى أنحاءٍ أخرى

قمر يحظى بنظرةٍ يأخذها منك

سلاماً أيها الطفل الساكن فينا

يبحث عن غصن

يركض خلف شطوط

لا يمسك ماء

يتنزه بين الورود

باسطاً يديه

لا يصل لشئ

هو وحده الملاك الأبيض

يربط الزمن بأجنحة العصافير 

ثم يسمح لها أن تطير

يتّحد الصقيع مع الدخان

يتغير شكل الأرض

تسترسل قدمى فـ الحلم

ألمح صياداً

يجلس قرب النهر

تذوى خطواتى

خائفة من شئ ما

وجهى مُصقل

لا أحد يسمع هذيانى

أجلس

أهدأ

أحاول أن أستريح

طائر يحملنى ويمضى

توقف الضوء

الريح تتخبط

خطوط عينيه تُحّول الأشياء

حولى إلى كلمات

تلامس قلبى

شعاع متواصل يقيدنى

منذ ولدت ... وحتى أموت

كفراشةٍ ضاله

يقودها الضوء



                                               إلهام عزت

عن الفتاه

كل بنت فى الدنيا فيها حاجه بتميزها
 هى جايز حتى ماتبقاش عارفاها
.
.
.
 لكنها موجوده

ساعات الميزه اللى بتكون فيها هى نفسها بتكون متخيلاها عيب 

صعب تواجه بنت بعيب شفته فيها
 هى مش بتقبل ده 

مش تغطرس ولا نفخه كدابه زى ما بيتخيل الناس
 هى بس بتتكسف أوى وبتخاف تكون واضحه لدرجة إن اللى قدامها يقراها

كل البنات بتخاف تكون الشخصيه الواضحه دى على فكره

البنت سهل أوى تحب
بس الصعب جدا بالنسبه ليها إنها تعترف بده حتى لنفسها

أعظم صفه تملكها بنت إنها تكون ذات حياء

بس على فكره الحياء بتاع البنت مش وش مكسوف وبيحمر كل أما تقابل حد ماتعرفوش ولا جرى من قدامك لو حاولت إنت تكلمها
 

الحياء ساعات عند بنات بيخليهم يتحولوا لشخصيات صلبه قدام كل شخص ماتعرفوش وقدام كل حد بيحاول يقرب منها
هى من حياءها بتحاول تبان قويه
هى من حياءها بتغير تووون صوتها لحاد علشان ماتديلكش فرصه تعجب بيه أصلا

هى من حياءها بتوصلك إحساس إنها مش بنت سهله ولا دلوعه من بتاعت اليومين دول
.
.
.
 صدقونى كل دا من حياءها

حياة جديده

    السلام عليكم ورحمة الله

كل فتره بحس إنى محتاجه تغيير

محتاجه طاقه أبدأ بيها حاجه جديده وأحبها

محتاجه مكان جديد وأصدقاء جدد يدخلوا نطاقى

اليوم فقط جئت أعرفكم بنفسى  وأتمنى أن أجد بينكم ما أبحث عنه

 أنا فتاه مصريه بسيطه جداً تعيش فى مجتمع واسع تسعى لإيجاد كل القيم التى توارثتها عن أمها ووالدها لكن تبحث عنها بشروطها هى تبحث عن الدين الممزوج بالعاطفه عن الدين المشجع الذى يبنى ويحمى يعمر وينمى

تبحث عن الصداقه الجميله التى كانت تسمع قصصها من والدها مع إضافه بعض فنون الصداقه التى تتمنى تطبيقها والرتوش التى تضفى روحها على الأمر

تبحث دوماً عن الحب فى عيون من حولها تُوجده حتى لو لم يكن موجود هى بالأساس تجيد إختراعه

تتمنى أن تعطى أن تفكر أن تحب أن تعيش قطه صغيره لطيفه مدلله مسئوله فى ذات الوقت

أعتذر عن إطالتى عليكم فى أول لقاء

فقط تمنيت أن أقدم نفسى علّي أجد بينكم مكان

هنا والآن أبدأ معكم وبكم حياة جديده واثقه أنها ستبنى لديَّ أفكار وثقافات وأصدقاء يمنحوننى سعاده وروح

                     

                                 إلهام عزت